नाशिक – बारा ज्योतिर्लिंगापैकी एक असलेल्या त्र्यंबकेश्वर ज्योतिर्लिंग मंदिरातील भाविकांची मोठी गर्दी लक्षात घेऊन देवस्थान ट्रस्टने येत्या ५ जानेवारीपर्यंत व्हीआयपी दर्शन बंद ठेवण्याचा निर्णय घेतला आहे.
नाताळनिमित्त शाळांना असलेल्या सुट्ट्यांमुळे गेल्या चार-पाच दिवसांपासून देशभरातून हजारो भाविक आद्य ज्योतिर्लिंग त्र्यंबकेश्वर मंदिरात दर्शनासाठी येत आहेत.नववर्षानिमित्त देखील गर्दी वाढणार आहे. त्याचे योग्य नियोजन करता यावे,तसेच मंदिर प्रशासनावरील ताण लक्षात घेऊन ५ जानेवारीपर्यंत व्हीआयपी दर्शन बंद राहणार आहे.मात्र या कालावधीत केवळ केंद्र, राज्य स्तरावरून किंवा जिल्हाधिकाऱ्यांमार्फत प्राप्त होणाऱ्या राजशिष्टाचारसंबंधी लेखी पत्रव्यवहाराने दररोज अतिमहत्त्वाच्या वीस व्यक्तींना सकाळी ७ ते १० व सायंकाळी ६ ते ७ या वेळेत दर्शनाची व्यवस्था केली जाणार आहे, अशी माहिती ट्रस्टच्या वतीने देण्यात आली आहे.
