मुंबई – मध्य रेल्वेने विविध अभियांत्रिकी आणि देखभालीच्या कामासाठी उद्या रविवार ९ फेब्रुवारी रोजी मुख्य आणि हार्बर मार्गावर मेगाब्लॉक जाहीर केला आहे. माटुंगा-मुलुंड अप आणि डाऊन जलद मार्गावर सकाळी ११:३० ते दुपारी ३:३० पर्यंत आणि हार्बर मार्गावर सीएसएमटी ते चुनाभट्टी/वांद्रे दरम्यान सकाळी ११.२० ते दुपारी ४.४० वाजेपर्यंत अप आणि डाऊन मार्गावर हा ब्लॉक राहील.
या ब्लॉक कालावधीत सीएसएमटीवरून सकाळी १०.५८ ते दुपारी ३.१० या वेळेत सुटणाऱ्या डाऊन जलद सेवा माटुंगा स्थानकात धीम्या मार्गावर वळवण्यात येणार आहेत. मुलुंड स्थानकातून या लोकल पुन्हा जलद मार्गावर वळवल्या जातील. त्यानंतर या स्थानकांदरम्यान या लोकल संबंधित थांब्यावर थांबून नियोजित वेळेपेक्षा १५ मिनिटे उशिरा पोहचतील. हार्बर मार्गावरील सीएसएमटी ते चुनाभट्टी/वांद्रे दरम्यान सकाळी ११.१० ते दुपारी ४.४० पर्यंत अप आणि डाउन हार्बर मार्गावर मेगाब्लॉक असणार आहे. त्यामुळे या कालावधीत सीएसएमटी ते पनवेल आणि वांद्रे/गोरेगाव सेवा रद्द राहतील. मात्र या कालावधीत
पनवेल-कुर्ला-पनवेल दरम्यान विशेष सेवा चालवल्या जातील. ब्लॉकमुळे हार्बर मार्गावर प्रवाशांना सकाळी १० ते सायंकाळी ६ वाजेपर्यंत मुख्य मार्गावर आणि पश्चिम रेल्वे मार्गाच्या स्टेशनवरून प्रवास करण्याची परवानगी आहे.