मुंबई – नवजात शिशूंसाठी राज्य सरकारतर्फे बेबी केअर किटचे वाटप करण्यात येते. आर्थिक वर्ष २०२४-२५ मध्ये या योजनेसाठी २४ कोटी ७७ लाख रुपयांचा निधी मंजूर करण्यात आला आहे. नवजात शिशूंच्या देखभालीसाठी मातांना आवश्यक साहित्य पुरविण्याच्या उद्देशाने ही योजना राबविण्यात येत असल्याची माहिती सार्वजनिक आरोग्य विभागाने दिली.
राज्यातील शासकीय प्राथमिक आरोग्य केंद्र आणि सरकारी रुग्णालयांमध्ये गरोदरपणी नाव नोंदणी केलेल्या आणि तेथेच प्रसुती झालेल्या महिलांना शासनातर्फे दोन हजार रुपयांपर्यंतच्या किंमतीचे बेबी केअर किट दिले जाते. ही योजना २०१९ पासून सुरू असून, गरोदरपणाची नाव नोंदणी करणाऱ्या आणि प्रसूतीनंतर दोन महिन्यांच्या आत अर्ज सादर करणाऱ्या महिलांना पहिल्या प्रसूतीच्या वेळी हे किट वितरित केले जाते. सरकारी रुग्णालयांमध्ये प्रसूतीसाठी महिलांना प्रोत्साहन देणे आणि नवजात शिशूंना आईचे दूध व योग्य पोषण मिळावे, हा या योजनेचा मुख्य उद्देश आहे. बेबी केअर किटमध्ये मुलाचे कपडे, छोटी गादी, टॉवेल, प्लास्टिक डायपर, मालिश तेल, थर्मामीटर, मच्छरदाणी, थंडीपासून बचावासाठी ब्लँकेट, शॅम्पू, नेलकटर, हातमोजे, पायमोजे, बॉडी वॉश लिक्विड, हँड सॅनिटायझर, आईसाठी गरम कपडे आणि खेळणी यांचा समावेश आहे.
