सँटियागो –
दक्षिण अमेरिकेतील चिली देशातील जंगलात लागलेल्या आगीत आतापर्यंत १२३ जणांचा होरपळून मृत्यू झाला आहे. या आगीत मोठ्या प्रमाणात लोक जखमी झाले आहेत. तर अनेक नागरिक बेपत्ता आहेत. मृतांचा आकडा वाढण्याची भीती अध्यक्ष गॅब्रिएल बोरिक यांनी वर्तवली आहे. या आगीत आतापर्यंत हजारो घरे जळून खाक झाली. आग विझविण्यासाठी प्रशासनाकडून शर्थीचे प्रयत्न सुरू आहेत. प्रशासनाकडून सुरु असलेल्या शोधमोहिमेत रस्त्यावर नागरिकांचे मृतदेह सापडत आहेत.
राष्ट्राध्यक्ष गॅब्रिएल बोरिक यांनी वलपरिसो आणि विना डेल मारसह किनारी भागातील नागरिकांची परिस्थिती पाहता आणीबाणीची स्थिती घोषित केली. बोरिक यांनी राष्ट्राला संबोधित करताना सांगितले की, आगीतील मृतांचा आकडा आणखी वाढण्याची अपेक्षा आहे कारण वालपरिसो प्रदेशात चार मोठी जंगले जळाली आहेत आणि अग्निशमन दलाचे अधिकारी उच्च जोखमीच्या भागात पोहोचण्यासाठी धडपडत आहेत. चिलीवासियांनी बचाव कर्मचाऱ्यांना सहकार्य करावे. जर तुम्हाला जागा रिकामी करण्यास सांगितले तर ते करण्यास मागेपुढे पाहू नका. आग झपाट्याने पसरत असून हवामानामुळे आटोक्यात आणणे कठीण झाले आहे. तापमान जास्त आहे, वारा जोरदार वाहत आहे आणि आर्द्रता कमी आहे.
राष्ट्रपती म्हणाले की संरक्षण मंत्रालय प्रभावित भागात अतिरिक्त लष्करी कर्मचारी पाठवून सर्व आवश्यक पुरवठा करेल. आगीत बळी पडलेल्यांच्या स्मरणार्थ त्यांनी ५ फेब्रुवारी आणि ६ फेब्रुवारी हे राष्ट्रीय शोक दिवस म्हणून घोषित केले. आगीमुळे तापमान ४० अंश सेल्सिअसवर पोहोचले आहे. उष्ण वारे सतत वाहत आहेत. अशा परिस्थितीत लोकांना सुरक्षित स्थळी पोहोचवण्यासाठी बचावकार्य सुरू आहे. उष्ण वाऱ्यांमुळे बचावकार्यात अडचणी येत आहेत. चिलीच्या गृहमंत्र्यांचे म्हणणे आहे की तापमानात घट आणि आर्द्रता वाढल्यास बचाव कर्मचाऱ्यांना थोडीफार मदत मिळेल आणि परिस्थिती सहज नियंत्रणात आणता येईल.
