प्रयागराज – १२ वर्षांंनंतर होणारा कुंभमेळा उत्तर प्रदेशमधील प्रयागराज येथे १३ जानेवारीपासून सुरू होत आहे.या कुंभमेळ्यासाठी साधूसंत गोळा होऊ लागले आहेत. मात्र या कुंभमेळ्यात आसाममधील कामाख्या पीठ येथून आलेले ५८ वर्षीय गंगापुरी महाराज हे खास आकर्षणाचे केंद्र ठरले आहेत.
गंगापुरी महाराज यांना छोटू बाबा म्हणूनही ओळखले जाते.केवळ ३ फूट ८ इंच उंची असलेले छोटू बाबा यांनी मागील ३२ वर्षांपासून आंघोळ केलेली नाही, असा दावा त्यांनीच केला आहे. त्यामुळे भाविकांमधील त्यांच्याबद्दलचे कुतुहल अधिकच वाढले आहे. त्रिवेणी संगमाच्या किनाऱ्यावर छोटू बाबा यांनी आपला तळ ठोकला आहे. तसेच ते संपूर्ण कुंभमेळ्यादरम्यान येथे राहणार आहेत.येथे येणारे भाविक त्यांची भेट घेऊन दर्शन घेतात.दरम्यान, मागील ३२ वर्षांपासून स्नान न करण्याच्या आपल्या निर्णयाबाबत गंगापुरी महाराज ऊर्फ छोटू महाराज यांनी म्हटले आहे की,मी ३२ वर्षांपासून स्नान केलेले नाही.कारण माझी एक इच्छा आहे.जी आतापर्यंत पूर्ण झालेली नाही.त्यामुळे मी गंगेत स्नान करणार नाही.मात्र कुंभमेळ्यामध्ये येण्यामुळे मी आनंदित आहे.तसेच तुम्ही सर्वजणही इथे आहात, तुम्हाला पाहून मी खुश आहे.
