कोलकाता
कोलकाता उच्च न्यायालयाने शुक्रवारी दुर्गापूर विकास प्राधिकरणाला १८ ते २२ सप्टेंबर दरम्यान सिद्धी विनायक पूजा समितीला सार्वजनिक मैदानांवर गणेशोत्सव आयोजित करण्याची परवानगी द्यावी, असे निर्देश दिले आहेत. या मैदानाचा उपयोग शासकीय कार्यक्रम आणि दुर्गापूजेसाठी केला जातो. तरीही सिद्धी विनायक पूजा समितीला तिथे गणेशोत्सव साजरा करण्याची परवानगी नाकारण्यात आली होती.
सिद्धी विनायक पूजा समितीने याचिकेत असे म्हटले होते की, मैदान सार्वजनिक स्वरूपाचे आहे. त्याचा उपयोग दुर्गापूजेसाठी केला जात आहे. त्यानंतर २०२२ मध्ये दुर्गापूर विकास प्राधिकरणाने हे मैदान केवळ दुर्गापूजेसाठीच वापरण्याचा निर्णय घेतला होता. सार्वजनिक मालमत्तेच्या अनुषंगाने प्रश्न असेल तर गणेशपूजा आणि दुर्गापूजा किंवा इतर शासकीय कार्यक्रमांमध्ये कोणताही फरक नसावा.
न्यायमूर्ती सब्यसाची भट्टाचार्य हा आदेश देताना म्हणाले, गणेशपूजेचे आयोजन करण्यास नकार देणे आणि दुर्गापूजा साजरी करण्यास परवानगी देणे हे भारतीय राज्यघटनेच्या कलम १४ अंतर्गत मूलभूत अधिकारांचे उल्लंघन आहे. मैदानात दुर्गापूजेला परवानगी असेल, तर इतर धर्मांच्या सणांनाही परवानगी देण्यात यावी. त्यांना परवानगी नाकारण्यामागे कोणतेच ठोस कारण नाही. मैदानावर दुर्गापूजा आणि सरकारी कामांना परवानगी दिली जाते, तर गणेशपूजेसाठी का नाही?
