नागपूर -समृद्धी महामार्गावर मोठ्या रकमेचा टोल वसूल करणाऱ्या मात्र नागरिकांसाठी आवश्यक असलेल्या सुविधांकडे तसेच कर्मचाऱ्यांच्या तक्रारींकडे दुर्लक्ष करणाऱ्या रोडवेज सॉल्यूशन्स कंपनीचा ठेका रद्द करण्यात आला. महाराष्ट्र राज्य रस्ते विकास महामंडळाने (एमएसआरडीसी) ही कारवाई केली.
समृद्धी महामार्गावर धावणाऱ्या वाहनांकडून टोल वसूल करण्याचे कंत्राट रोडवेज सॉल्यूशन्स कंपनीला ११ डिसेंबर २०२२ ला देण्यात आला होता. तो आता रद्द करण्यात आल्याने या कंपनीची भागीदार असलेल्या ‘फास्टगो’चे टेंडरही टर्मिनेट करण्यात आले आहे. एकीकडे महामार्गाचा वाहनधारकांकडून मोठ्या प्रमाणात उपयोग वाढत असताना टोल प्लाझावर आवश्यक सुविधा मिळत नसल्याने वाहनधारक, नागरिकांकडून ओरड होत होती. तर दुसरीकडे टोल प्लाझावर काम करणारे सुमारे २८०० कर्मचारीदेखील वेळेवर वेतन न मिळाल्याने त्रस्त होते. टोल वसुली करणाऱ्या या एजन्सीविरुद्ध ५० पेक्षा जास्त तक्रारी एमएसआरडीसीकडे आल्या होत्या. त्या तक्रारीत शौचालयाचा अभाव, तक्रार नोंदवण्यासाठी सुविधा नसणे, कर्मचाऱ्यांना वेळेवर वेतन न देणे, त्यांचा पीएफ जमा न करणे, ईएसआयसी कार्ड न बनविणे आदींचा त्यात समावेश होता. या कंपनीला गेल्या वर्षभरात ६९ नोटीस देण्यात आल्या होत्या. मात्र त्याला दाद मिळत नव्हती. त्यामुळे अंतिम नोटीस १६ सप्टेंबरला बजावण्यात आली होती. मात्र, कसलीही सुधारणा होत नसल्याचे पाहून अखेर एमएसआरडीसीने या कंपनीचा कंत्राट आता रद्द केला. एमएसआरडीसीने आता जी नवीन निविदा मागविली त्यात केवळ तीन महिन्यांसाठीच टेंडर दिले जाणार आहे.
समृद्धी महामार्गावरील टोल वसुली एजन्सीचे कंत्राट रद्द
