नवी दिल्ली :
व्यावसायिक एलपीजी सिलेंडरच्या दरात कपात करण्यात आली आहे. कंपन्यांनी १ मे म्हणजेच आजपासून १९ किलो व्यावसायिक एलपीजी सिलेंडरच्या किमती १७१.५० रुपयांनी कमी केल्या. त्यामुळे आजपासून देशाची राजधानी दिल्लीत १९ किलोच्या व्यावसायिक एलपीजी सिलेंडरची किंमत १८५६.५० रुपये झाली आहे.
आर्थिक राजधानी मुंबईत १९ किलोच्या एलपीजी सिलेंडरसाठी १८०८.५० रुपये मोजावे लागणार आहेत. दरम्यान घरगुती एलपीजी सिलेंडरच्या दरात मात्र कोणताही बदल झालेला नाही. याआधी १ एप्रिल रोजी म्हणजेच महिनाभरापूर्वी व्यावसायिक एलपीजी सिलेंडरच्या दरात ९१.५० रुपयांनी कपात करण्यात आली होती. त्यानंतर आज १९ किलो एलपीजी सिलेंडरचे दर १७१.५० रुपयांनी कमी करण्यात आले आहेत. अशाप्रकारे व्यावसायिक एलपीजी सिलेंडर मागील दोन महिन्यांत २६३ रुपयांनी स्वस्त झाला. प्रत्येक महिन्याच्या पहिल्या दिवशी पेट्रोलियम कंपन्या एलपीजी सिलेंडरचे नवीन दर ठरवतात, त्यानुसार आज १७१.५० रुपयांनी कपात करण्याचा निर्णय घेण्यात आला.
