कोल्हापूर – कोल्हापुरातील किल्ले विशालगड येथे पशू-पक्षांची हत्या करून त्यांचे अन्न शिजवण्यास बंदी घालणारा आदेश पुरातत्त्व विभागाने लागू केला आहे. याबाबतचे पत्र शाहूवाडीचे तहसीलदार आणि पोलीस निरीक्षक यांना पाठवून यावर कारवाई करण्याच्या सूचना केल्या आहेत.

विशालगडावर तंबाखूजन्य पदार्थ, दारु आणि गांजा विक्री आणि सेवन करुन हुल्लडबाजी करणाऱ्यांचे प्रमाण वाढल्यामुळे त्याला प्रतिबंध करण्याची मागणी करण्यात आली होती. मुंबई हायकोर्टाच्या औरंगाबाद खंडपीठाच्या 1998 च्या आदेशानुसार देवी देवतांच्या नावाने सार्वजनिक ठिकाणी पशुपक्षी बळी देण्यास मनाई केली आहे. विशालगड किल्ला या राज्य संरक्षित स्मारकाच्या परिसरात पशुहत्या बंदी अनुषंगाने कार्यवाही करावी, असे पत्र पुरातत्व विभागाचे सहाय्यक संचालक डॉ. विलास वाहने यांनी पाठवले.