रत्नागिरी – भक्षाचा पाठलाग करताना सांडपाण्याच्या सिमेंटच्या टाकीत पडून बिबट्याचा मृत्यू झाला. ही घटना आज रायपाटण टक्केवाडी येथे घडली. टाकीतील पाण्यात गुदमरून बिबट्याचा मृत्यू झाल्याची माहिती पशू वैद्यकीय अधिकाऱ्यांनी दिली. सुमारे अडीच ते तीन वर्षांचा मादी जातीतील हा बिबट्या होता.आज सकाळी साडेनऊच्या सुमारास मौजे-रायपाटण, टक्केवाडी येथील रामचंद्र बाळकृष्ण रोडे यांच्या घराजवळ सांडपाण्यासाठी बांधण्यात आलेल्या सिमेंटच्या टाकीत बिबट्या मृतावस्थेत आढळला. याची माहिती टक्केवारी पोलिस पाटील मृन्मयी पांचाळ यांनी परिमंडळ वन अधिकारी राजापूर यांना दूरध्वनीवरून दिली. बिबट्याच्या बाजूलाच ज्या भक्षाचा त्याने पाठलाग केला होता. ते मांजर देखील मृत होऊन पडले होते. वनविभागाच्या अधिकाऱ्यांनी मृत बिबट्याला दोरीच्या सहाय्याने बाहेर काढले.