संगमेश्वर- रत्नागिरी जिल्ह्यातील संगमेश्वर, सावर्डे, चिपळूण येथील प्रवाशांची गेल्या २५ वर्षांची मागणी अखेर पूर्ण झाली आहे.एसटी महामंडळाने रत्नागिरी-पुणे ही रातराणी शिवशाही गाडी चिपळूणमार्गे १ ऑक्टोबरपासून सुरू केली आहे.
एसटीतर्फे सर्व्हे करण्यात आलेल्या महाराष्ट्रातील ‘गोल्डन रूट’मध्ये चिपळूण मार्गाचा समावेश करण्यात आला आहे. खासगी गाड्या मोठ्या प्रमाणात वाहतूक करत असलेल्या या मार्गावर एसटीची गाडी सुरू करण्यात यावी अशी मागणी होती.अखेर देवरूख येथील सामाजिक कार्यकर्ते युयुत्सू आर्ते यांनी केलेल्या आग्रही मागणीला रत्नागिरी जिल्ह्याचे जिल्हा नियंत्रक बोरसे यांनी सकारात्मक प्रतिसाद दिला.रत्नागिरीहून रात्री ८.३० वाजता संगमेश्वरहून रात्री ९.४५ वा. आणि चिपळूणहून रात्री ११ वाजता ही गाडी पुण्याला जाणार आहे. रत्नागिरी-साखरपा-कोल्हापूर-पुणे,रत्नागिरी-साखरपा-मलकापूर-कोकरूड मार्गे पुणे या मार्गावर तीन-तीन गाड्या चालवण्यात येत होत्या. या मार्गापेक्षा जास्त प्रवासी भारमान संगमेश्वर-सावर्डे-चिपळूण या मार्गावर असताना गाडी चालू करण्यात येत नव्हती. अखेर जास्त प्रवासी भारमान असलेल्या रत्नागिरी-चिपळूण-पुणे या मार्गावर रातराणी शिवशाही गाडी सुरू झाल्यामुळे संगमेश्वर, सावर्डा, चिपळूण येथील प्रवाशांनी प्रवास करावा,असे आवाहन करण्यात येत आहे.