• भारतात आणणे अवघड

रोसो – भारतात १३ हजार कोटींचा गैरव्यवहार करून परदेशात पलायन केलेला हिरा व्यापारी मेहुल चोकसी याला देशात परत आणणे अवघड झाले आहे. चोकसी सध्या अँटिग्वात आणि बारबुडा येथे लपलेला आहे. या देशातील हायकोर्टाने मेहुलच्या बाजूने निकाल दिला आहे. आता हायकोर्टाच्या आदेशाशिवाय मेहुल चोकसीला अँटिग्वात आणि बारबुडातून बाहेर नेण्यास मज्जाव करण्यात आला आहे.

६३ वर्षांचा हिरे व्यापारी मेहुल चोकसी हा पंजाब नॅशनल बँकेच्या १३ हजार कोटींच्या गैरव्यवहार प्रकरणी भारतात वॉन्टेड आहे. चोकसीने केलेल्या गैरव्यवहाराची चौकशी सीबीआय करत आहे. त्याला परत भारतात आणण्यासाठी सीबीआय प्रयत्नशील आहे. अँटिग्वात आणि बारबुडा येथील कोर्टाच्या निर्णयानंतरही सीबीआय त्याला भारतात आणण्यासाठी प्रयत्न करत राहणार असल्याचे सीबीआयने स्पष्ट केले आहे. मेहुलला चोकसीला देशात आणून देशाच्या कोर्टासमोर हजर करण्यात येईल, असे सीबीआयने जारी केलेल्या प्रसिद्धीपत्रक म्हटले आहे. भारतातून पळून गेलेल्या आरोपींना परत आणण्यासाठी विदेशातील लॉ एन्फोर्समेंट यंत्रणांसोबत समन्वय साधून योग्य पावले उचलण्यात येत असल्याचेही नमूद करण्यात आले आहे. पलायन केलेले आरोपी कुठे आहेत यांचा शोध घेण्यात येत असून, योग्य सनदशीर मार्गांनी त्यांना परत आणण्याचे प्रयत्न सुरू असल्याचे सीबीआयने म्हटलेले आहे. गेल्या १५ महिन्यांत अशा ३० आरोपींना देशात परत आणण्यात आल्याचीही माहिती सीबीआयने दिली आहे.