मुंबई – उपनगरी रेल्वे मार्गावरील रुळांची दुरुस्ती तसेच तांत्रिक कामे करण्यासाठी उद्या रविवारी १६ फेब्रुवारी रोजी रेल्वेच्या तिन्ही मार्गांवर मेगाब्लॉक घेण्यात आला आहे. या काळात मध्य रेल्वेच्या सीएसएमटी ते विद्याविहार अप आणि डाऊन धीम्या मार्गावर, तर हार्बर मार्गावरील वाशी ते कुर्ला अप आणि डाऊन मार्गावर तसेच पश्चिम रेल्वेवर गोरेगाव ते बोरिवली अप आणि डाऊन जलद मार्गावर मेगाब्लॉक असणार आहे.
मध्य रेल्वे सीएसएमटी ते विद्याविहार अप आणि डाऊन धीम्या मार्गावर सकाळी १०.५५ ते दुपारी ३.३५ पर्यंत मेगाब्लॉक राहणार आहे. मेगाब्लॉक काळात सीएसएमटी येथून सुटणाऱ्या धीम्या गाड्या सीएसएमटी ते विद्याविहार स्थानकांदरम्यान डाऊन जलद मार्गावर भायखळा, परळ, दादर, माटुंगा, शीव आणि कुर्ला स्थानकात थांबतील. पुढे विद्याविहार स्थानकापासून डाऊन मार्गावर वळवण्यात येतील.
हार्बर रेल्वे मार्गावर कुर्ला ते वाशी अप आणि डाऊन मार्गावर सकाळी ११. १० ते दुपारी ४.१० वाजेपर्यंत मेगाब्लॉक राहणार आहे. याकाळात सीएसएमटी येथून सकाळी १०.१६ ते दुपारी ३.४७ पर्यंत पनवेल/बेलापूर/वाशी दरम्यान धावणार्‍या अप आणि डाऊन लोकल गाड्या बंद राहतील. ब्लॉक काळात सीएसएमटी ते कुर्ला आणि पनवेल-वाशी विभागांवर विशेष उपनगरी लोकल गाड्या चालवल्या जातील.
पश्चिम रेल्वे मार्गावर गोरेगाव ते बोरिवली अप आणि डाऊन जलद मार्गावर सकाळी १० ते दुपारी ३ वाजेपर्यंत मेगाब्लॉक राहणार आहे. या कालावधीत अप आणि डाऊन जलद मार्गावरील सर्व लोकल गोरेगाव ते बोरिवली यादरम्यान धीम्या मार्गावरून धावणार आहेत. तसेच अप आणि डाऊन मार्गावरील काही लोकल रद्द केल्या आहेत.