बुलडाणा – मलकापूर-बुलढाणा बसचा आज सकाळी १० वाजता भीषण अपघात झाला. या एसटीचा ब्रेक फेल होऊन चालकाचे वाहनावरील नियंत्रण सुटल्यामुळे हा अपघात झाला. ही बस राजूर घाट कोसळली असून या बसमध्ये जवळपासून ५५ प्रवासी प्रवास करत होते. या अपघातात १० ते १५ प्रवासी जखमी झाले. या अपघाताची माहिती मिळताच स्थानिकांनी घटनास्थळी धाव घेतली. या अपघातामध्ये कोणत्याही प्रकारची जीवितहानी झाली नाही.
मलकापूरहून बुलढाणाकडे ही बस निघाली होती. घाट चढत असताना पायथ्याशी असणाऱ्या चढावावर अचानक बस खाली येत असल्याचे चालक आणि वाहकाच्या लक्षात आले. दरम्यान त्यांनी बसवर नियंत्रण साधण्याचा प्रयत्न केला. मात्र, बस खाली येऊन रस्त्यालगतच्या झाडावर मागील बाजूने धडकली आणि बस रस्त्याच्या कडेला पलटी झाली. जखमी प्रवाशांना जिल्हा सामान्य रुग्णालयात उपचारासाठी नेण्यात आले.
