मुंबई – मध्य रेल्वे मार्गावरील मध्य आणि हार्बर मार्गावर उद्या रविवार ७ मे रोजी दिवसा कोणताही मेगाब्लॉक घेण्यात आलेला नाही.मात्र उपनगरी रेल्वे मार्गावरील रुळांची दुरुस्ती तसेच सिग्नल यंत्रणेत काही तांत्रिक कामे करण्यासाठी उद्या ट्रान्सहार्बर आणि पश्चिम रेल्वेवर मात्र मेगाब्लॉक घेण्यात येणार आहे.मध्य रेल्वेच्या ट्रान्सहार्बर ठाणे – वाशी/नेरुळ अप आणि डाउन मार्गावर, तर पश्चिम रेल्वेच्या बोरिवली- गोरेगाव अप- डाऊन जलद मार्गावर हा मेगाब्लॉक असणार आहे.
मध्य रेल्वेच्या ट्रान्सहार्बर मार्गावर ठाणे – वाशी/नेरुळ अप आणि डाउन जलद मार्गावर उद्या सकाळी ११ .१० ते दुपारी ४.१० पर्यंत हा मेगाब्लॉक असणार आहे. या ब्लॉकदरम्यान ठाणे येथून वाशी/नेरुळ/पनवेलसाठी सुटणाऱ्या डाउन मार्गावरील सेवा आणि वाशी/नेरूळ/पनवेल येथून ठाणेकरीता सुटणाऱ्या अप मार्गावरील सेवा रद्द रहाणार आहे. तसेच रविवार मध्य रेल्वेच्या मुख्य मार्गावर आणि हार्बर मार्गावर मेगा ब्लॉक नसणार आहे.
त्याचप्रमाणे पश्चिम रेल्वे मार्गावर गोरेगाव ते बोरिवली अप- डाऊन जलद मार्गावर आज शनिवारी रात्री ११. ४५ ते रविवारी पहाटे ४.१५ वाजेपर्यत मेगाब्लॉक राहणार आहे.या ब्लॉकदरम्यान अप-डाउन जलद मार्गावरील लोकल सेवा गोरेगाव ते बोरिवली स्थानकादरम्यान धीम्या मार्गावर वळविण्यात येणार आहेत.या ब्लॉकलमुळे काही लोकल गाड्या लोकल सेवा रद्द असणार आहे.
