सोलापूर – मंगळवेढा शहरातील छत्रपती शिवाजी महाराज शासकीय रुग्णालयांत वृद्धांसाठी विशेष ओपीडी सुरू करण्यात आली आहे. त्यामुळे आता उपचारासाठी वृद्धांना रांगेत थांबण्याची गरज नाही.यात फक्त वृद्धांनाच तपासले जाणार आहे.यामुळे त्यांची होणारी धावपळ थांबणार आहे. त्यांना एकाच ठिकाणी सर्वच उपचार मिळणार आहेत,अशी माहिती येथील आरोग्य अधिकाऱ्यांनी दिली.
वृद्धांसाठी आरोग्यसेवा अधिक सुलभ करण्याच्या दृष्टीने शासकीय रुग्णालयात हे ‘जेरियाट्रिक क्लिनिक’ सुरू करण्यात आले आहे. या क्लिनिकचे उद्घाटन नुकतेच डीन डॉ.संजीव ठाकूर यांच्या हस्ते करण्यात आले.ही ओपीडी नेत्र ओपीडीच्या जवळ सुरू करण्यात आलेली आहे. यामुळे वृद्धांना थेट तिथे जाऊन उपचार घेता येणार आहेत.शासनाच्या या उपक्रमामुळे वृद्धांना आवश्यक आरोग्य सेवा विनामूल्य मिळून याचा नियमित फायदा होणार आहे.या ओपीडीत विविध विभागातील डॉक्टरांची टीम असणार आहे. त्यांना केसपेपर काढण्यासाठीही स्वतंत्र अशी व्यवस्था करण्यात आली आहे ,अशी माहिती औषध विभाग प्रमुख डॉ.विठ्ठल धडके यांनी दिली.