पुणे – दरवर्षी भाऊबीजेच्या दिवशी मार्केट यार्डातील फळे, भाजीपाला विभागाचे कामकाज बंद ठेवण्यात येते. यंदा रविवारी भाऊबीज आहे. शनिवारी २ नोव्हेंबर रोजी बाजारला साप्ताहिक सुट्टी असते. सलग दोन दिवस मार्केट यार्डातील घाऊक बाजाराचे काम बंद राहिल्यास बाजारात भाजीपाल्याचा तुटवडा निर्माण होईल. त्यामुळे यंदा भाऊबीजेच्या दिवशी फळे, भाजीपाला विभाग, पान बाजाराचे कामकाज नियमित सुरू राहणार आहे.सलग दोन दिवस बाजाराचे कामकाज बंद ठेवल्यास भाजीपाल्याची आवक होणार नाही. सणासुदीत नागरिकांना भाजीपाला उपलब्ध होणार नाही. त्यामुळे यंदा भाऊबीजेच्या दिवशी बाजाराचे कामकाज नेहमीप्रमाणे सुरू राहणार आहे. भाऊबीजेच्या दिवशी शेतकऱ्यांनी शेतीमाल विक्री पाठवावा असे आवाहन पुणे कृषी उत्पन्न बाजार समितीचे सभापती दिलीप काळभोर आणि सचिव डॉ. राजाराम धोंडकर यांनी केले आहे. भाऊबीजेच्या दिवशी केळी बाजार आणि मोशी उपबाजार बंद राहणार आहे, भाऊबीजेच्य दुसऱ्या दिवशी सोमवारी दरवर्षीप्रमाणे फूल बाजाराचे कामकाज बंद ठेवण्यात येणार आहे, असे बाजार समितीने कळविले आहे.