बदलापूर – बदलापूरमध्ये एका १९ वर्षीय तरुणीवर रिक्षाचालकाने अत्याचार केल्याची घटना उघडकीस आली. पीडितेच्या मैत्रिणीनेच या गुन्ह्यात रिक्षाचालकाला मदत केली होती, असे तपासातून निष्पन्न झाल्यावर पोलिसांनी आरोपी रिक्षाचालक आणि पीडितेच्या मैत्रिणीला काल अटक केली.
पीडित तरुणी ही २१ डिसेंबर रोजी बदलापूरला तिच्या मैत्रिणीला भेटण्यास गेली होती. यावेळी मैत्रिणीने तिच्या रिक्षाचालक मित्रालाही बोलावून घेतले. त्यानंतर तिघांनी मद्यपान केले. मद्यपान केल्यानंतर पीडित तरुणी शुद्धीत नसल्याचा गैरफायदा घेत रिक्षाचालकाने तिच्यावर अत्याचार केला. पीडित तरुणीच्या मैत्रिणीनेही या कृत्यात त्याची साथ दिली. पीडित तरुणी शुद्धीत आल्यानंतर हा प्रकार तिच्या लक्षात आला. या प्रकरणी तिने २३ डिसेंबर रोजी बदलापूर पूर्व पोलीस ठाण्यात दिलेल्या तक्रारीवरून पोलिसांनी गुन्हा दाखल केला. या तक्रारीनंतर काल बदलापूर पोलिसांनी खरवई येथे त्याच्या बहिणीच्या घरातून त्याला अटक केली. पीडितेच्या मैत्रिणीलाही अटक करण्यात आली.
