पुणे – सावित्रीबाई फुले पुणे विद्यापीठाचा आता देशाबाहेर विस्तार होत आहे. कतार येथे सुरू केलेले शैक्षणिक केंद्रानंतर आता आणखी चार देशांमध्ये विद्यापीठाचे केंद्र सुरू करण्यासाठी विद्यापीठाच्या व्यवस्थापन परिषदेने मंजुरी दिली आहे.
विद्यापीठाला आंतरराष्ट्रीय स्तरावर नेण्याच्या प्रयत्नांचा भाग म्हणून तीन वर्षांपूर्वी विद्यापीठाचे शैक्षणिक केंद्र कतार केले. या केंद्राद्वारे विविध अभ्यासक्रम शिकवण्यात येतात. सुमारे पाचशेहून जास्त विद्यार्थी या केंद्राच्या माध्यमातून शिक्षण घेत आहेत. या पार्श्वभूमीवर आता जॉर्जिया, दुबई, सौदी, कझाकिस्तान येथे ही उपकेंद्र सुरू होण्याची शक्यता आहे.
या देशांकडून सावित्रीबाई फुले पुणे विद्यापीठाचे केंद्र सुरू करण्याचा प्रस्ताव संबंधित देशांतून सादर करण्यात आला आहे. त्यानुसार व्यवस्थापन परिषदेच्या बैठकीत चर्चा करून केंद्र सुरू करण्यास मंजुरी देण्यात आली. स्थानिक व्यवस्थापनाच्या सहकार्याने विद्यापीठाचे केंद्र सुरू करण्यात येईल. त्यानुसार इरादापत्र देण्याची प्रक्रिया सुरू केली जाणार असल्याचे विद्यापीठाचे कुलगुरू डॉ. सुरेश गोसावी यांनी सांगितले.