कोलकाता – पश्चिम बंगालचे माजी मुख्यमंत्री आणि कम्युनिस्ट पक्षाचे ज्येष्ठ नेते बुद्धदेव भट्टाचार्य यांचे आज सकाळी ८.२० वाजता निधन झाले. कोलकातामधील पाम एव्हेन्यू येथील निवासस्थानी त्यांनी अखेरचा श्वास घेतला. ८० वर्षीय भट्टाचार्य काही वर्षांपासून गंभीर आजाराने त्रस्त होते. भट्टाचार्य यांच्या पश्चात त्यांची पत्नी मीरा आणि मुलगी सुचेतना असा परिवार आहे.काल रात्री बुद्धदेव यांची प्रकृती खालावली. त्यामुळे डॉक्टरांना बोलावण्यात आले. त्यांना रुग्णालयात दाखल करावे का याचा निर्णय डॉक्टर आज घेणार होते. मात्र त्याआधीच सकाळी त्यांची प्रकृती अधिकच खालावली आणि रुग्णालयात दाखल करण्यापूर्वीच त्यांचे निधन झाले.दरम्यान, देशात सर्वाधिक काळ मुख्यमंत्रीपदावर राहिलेले कम्युनिस्ट नेते ज्योती बसू आरोग्याच्या कारणास्तव २००० साली मुख्यमंत्रीपदावरून पायउतार झाल्यानंतर बुद्धदेव भट्टाचार्य यांची मुख्यमंत्रीपदी वर्णी लागली होती. मुख्यमंत्री असताना भट्टाचार्य यांनी डाव्या पक्षांची आघाडी करून २००१ आणि २००६ च्या निवडणुकीत विजय मिळविला होता. बुद्धदेव भट्टाचार्य २०१९ साली शेवटचे सार्वजनिक मंचावर दिसले होते.