गुवाहाटी – पंतप्रधान नरेंद्र मोदी यांनी शुक्रवारी आसामची राजधानी गुवाहाटी येथे एम्सचे उद्घाटन केले. याशिवाय अन्य तीन वैद्यकीय महाविद्यालयांचे उद्घाटनही त्यांच्या हस्ते केले. यामध्ये गुवाहाटीमधील कोक्राझार, नलवारी आणि नागाव महाविद्यालये आणि रुग्णालयांचा समावेश आहे. याशिवाय पंतप्रधानांनी आसामला 14,300 कोटी रुपयांची भेटही दिली.
आसाममध्ये सध्या वसंतोत्सव सुरू आहे. शुक्रवारी पंतप्रधान नरेंद्र मोदी एक दिवसीय दौर्‍यावर गुवाहाटी येथे पोहोचले. गुवाहाटी विमानतळावर राज्यपाल गुलाबचंद कटारिया आणि मुख्यमंत्री हिमंता बिस्वा सरमा यांनी पंतप्रधान मोदींचे स्वागत केले. ‘रोंगाली बिहू’च्या पहिल्याच दिवशी त्यांनी 1120 कोटी रुपये खर्चून बांधलेल्या अत्याधुनिक सुविधांनी सुसज्ज गुवाहाटी एम्सचे उद्घाटन केले. त्याची पायाभरणी त्यांनी मे 2017 मध्ये केली होती.
यावेळी पंतप्रधानांनी नलबारी मेडिकल कॉलेज, नागाव मेडिकल कॉलेज आणि कोकराझार मेडिकल कॉलेज 500 बेड्स असलेले 3 मेडिकल कॉलेजचे उद्घाटन केले. गुवाहाटी एम्सची बांधणी कामरूप या ग्रामीण जिल्ह्यातील चांगसारी येथे करण्यात आली आहे. ईशान्येतील ही पहिली अखिल भारतीय वैद्यकीय विज्ञान संस्था आहे. गुवाहाटी एम्समध्ये सध्या उपलब्ध असलेल्या सेवांमध्ये डे केअर, फार्मसी, प्रयोगशाळा सुविधा आणि रेडिओलॉजिकल चाचण्यांचा समावेश आहे.