मुंबई- अखिल भारतीय नाट्य परिषदेच्या नियामक मंडळाचा अंतिम आणि सर्वांत महत्त्वाचा टप्पा उद्या मंगळवारी पार पडणार आहे. कारण उद्या मंगळवार १६ मे रोजी नाट्य परिषदेच्या कार्यकारी मंडळाची निवडणूक होणार आहे.यावेळी अध्यक्ष पदासाठी अभिनेते प्रशांत दामले आणि मावळते अध्यक्ष प्रसाद कांबळी यांच्यात लढत होणार असली तरी सर्वाधिक पसंती प्रशांत दामले यांनाच दिसत आहे.कारण नियामक मंडळाच्या ६० सदस्यांमध्ये ५२ सदस्य हे प्रशांत दामले यांच्या रंगकर्मी नाटक समुह पॅनेलचे विजयी उमेदवार आहेत.
रंगकर्मी नाटक समुह पॅनेलने निवडणुकीआधीच प्रशांत दामले हे अध्यक्षपदाचे उमेदवार म्हणून जाहीर केले आहे.त्यामुळे त्यांचे तब्बल ५२ उमेदवार निवडून आले आहेत.नियामक मंडळाची सदस्य संख्या ६० असून १९ जणांचे कार्यकारी मंडळ असणार आहे.उद्या सकाळी १०.३० वाजता यशवंत नाट्य संकुलात निवडणूक प्रक्रिया पार पडणार आहे. उपाध्यक्ष (प्रशासन) पदासाठी नरेश गडेकर आणि अविनाश नारकर यांच्यात लढत होईल.तर उपाध्यक्ष (उपक्रम) पदासाठीच्या शैलेश गोजमगुंडे आणि आनंद कुलकर्णी यांनी माघार घेतल्याने भाऊसाहेब भोईर यांची बिनविरोध निवड होणार आहे.तसेच खजिनदार पदासाठी रंगकर्मीचे सतीश लोटके,तर विणा लोकुर या स्वतंत्र उमेदवार म्हणून निवडणूक लढवित आहेत.
तर प्रमुख कार्यवाह पदासाठी अजित भुरे आणि नाथा चितळे हे दोघे निवडणूक रिंगणात आहेत. तसेच सहकार्यवाह पदासाठी सुकन्या कुलकर्णी-मोने आणि ऐश्वर्या नारकर यांच्यासह सात उमेदवार निवडणूक लढवित आहेत. कार्यकारी समितीसाठी सविता मालपेकर,सुशांत शेलार, विजय चौगुले यांच्यासह १६ उमेदवार निवडणूक रिंगणात उतरले आहेत.नवीन कार्यकारिणीत एक अध्यक्ष,दोन उपाध्यक्ष, एक कार्यवाह,तीन सहकार्यवाह,एक कोषाध्यक्ष आणि अकरा सभासद असणार आहेत.
