डहाणू – तालुक्यातील चिखले गावच्या हद्दीतील विजयवाडी परिसरात बिबट्याचा वावर वाढत चालला आहे. पाच दिवसांपूर्वी रात्री बिबट्याने एका घराजवळ बांधलेल्या बकरीची शिकार केली.या घटनेनंतर परिसरात भीतीचे वातावरण निर्माण झाले आहे.
बिबट्याने बकरीची शिकार केल्यानंतर बोर्डी वनक्षेत्रपाल आर.एस. सारणीकर यांच्या नेतृत्वाखाली पंचनामा करून बिबट्याचा माग काढण्यासाठी ३ ट्रॅप कॅमेरे बसविण्यात आले आहेत.
सध्या चिखले आणि घोलवड गावातील शेतकरीवर्गात बिबट्याच्या दहशतीमुळे भीती पसरली आहे. १५ ऑक्टोबरच्या रात्री लक्ष्मी आरदोरी या महिला शेतकर्याच्या शिवारातील झोपडीनजिकच्या गोठ्यातील दोन बकर्या गायब झाल्या. यापैकी एका बकरीला बिबट्याने हल्ला करून ठार मारले. या परिसरातील एका शेतात बिबट्याचे ठसे आढळले असले तरी इथे लावलेल्या कॅमेर्यांमध्ये बिबट्याचा दिसलेला नाही.सध्या भातकापणी हंगामाला सुरुवात झाली असून, परिसरात चिकू बागायती असल्याने शेतकरी आणि मजुरांमध्ये भीतीचे वातावरण पसरले आहे.या पार्श्वभूमीवर वन विभागाने नागरिकांना दक्ष राहण्याचे आवाहन केले आहे.तसेच,गस्तीपथकाची नेमणूक करण्यात आली आहे.