पुणे- जुन्नर तालुक्यातील पिंपरी पेंढार गावच्या हद्दीत डेरेमळा येथे आज सकाळी बिबट्याने हल्ला करुन ४० वर्षीय महिलेला ठार केले. या घटनेनंतर आजूबाजूच्या परिसरात नागरिकांमध्ये भीतीचे वातावरण निर्माण झाले आहे.पिंपरी पेंढार येथील डेरेमळा येथे सुजाता रवींद्र डेरे ही महिला सकाळी सहा वाजता लघुशंकेसाठी घराबाहेर पडली होती. मात्र त्याचवेळी दबा धरून बसलेल्या बिबट्याने त्यांच्यावर झडप घालून त्यांच्यावर जोरदार हल्ला केला. बिबट्याने त्यांना घरापासून १०० फूट ओढत नेऊन ठार केले. या घटनेची माहिती मिळताच पोलीस आणि वनविभागाचे कर्मचारी घटनास्थळी पोहोचले आणि हल्ला करणाऱ्या बिबट्याचा शोध सुरू केला.
