श्रीनगर – जम्मू-श्रीनगर राष्ट्रीय महामार्गावर दरड कोसळल्याने मोठी दुर्घटना घडली. त्यानंतर घरंगळत रस्त्यावर आलेल्या दगडाला दगडाला ट्रक धडकून खोल दरीत कोसळला. या घटनेत ४ जण ठार झाले, तर ६ जनावरेही दगावली. आज पहाटेच्या सुमारास रामबन जिल्ह्यातील बनिहाल परिसरातील शेर बीबीजवळ हा अपघात घडला.
या घटनेची माहिती मिळताच स्थानिक पोलीस आणि बचाव पथकांनी घटनास्थळी धाव घेत मृतदेह दरीतून बाहेर काढले. एका अधिकाऱ्याने सांगितले की, ट्रक जम्मूहून श्रीनगरला जात होता. पहाटेच्या सुमारास जम्मू-श्रीनगर राष्ट्रीय महामार्गावर भूस्खलन झाल्याने रस्त्यावर आलेल्या एका मोठ्या दगडाला ट्रक धडकून दरीत कोसळला. या अपघातात चारही प्रवासी जागीच ठार झाले. तसेच ट्रकमधून नेत असलेल्या सहा जनावरांचाही मृत्यू झाला. या अपघातानंतर जम्मू-श्रीनगर राष्ट्रीय महामार्ग वाहतुकीसाठी बंद करण्यात आला होता.