मुंगेली – छत्तीसगड येथील मुंगेली येथील एका लोखंडाच्या कारखान्यातील तापलेल्या राखेची टाकी कोसळून झालेल्या दुर्घटनेत एका कामगाराचा मृत्यू झाला असून दोघेजण बेपत्ता आहेत. यादुर्घटनेत काही कामगार जखमी झाले असून त्यांना रुग्णालयात दाखल करण्यात आले आहे.मुंगेली जिल्ह्यातील रामबोड येथील कुसुम प्लांट या लोखंडाच्या कारखान्यात काल ही घटना घडली. दुपारी कारखान्याच्या चिमणीच्या शेजारी असलेली राखेची टाकी कोसळली. यावेळी बहुसंख्य कामगार हे जेवणासाठी गेल्यामुळे अधिक जिवीतहानी झाली नाही. या टाकीच्या खाली येऊन एका कामगाराचा मृत्यू झाला असून या गरम राखेच्या ढिगाऱ्याखाली इतर दोन कामगार दबले असल्याची माहिती प्रशासनाने दिली आहे. या दुर्घटनेत जखमी झालेल्या इतर कामगारांना रुग्णालयात दाखल करण्यात आले आहे.