नवी दिल्ली- पासपोर्टच्या जागी ई-पासपोर्ट आणण्यासाठी मोदी सरकारने जोरदार लगबग सुरु केली आहे. मे महिन्यात ई-पासपोर्टचे वितरण सुरू होणार असून ई-पासपोर्ट बुकलेटच्या स्वरूपात असणार आहे. त्यात एक इलेक्ट्रॉनिक चिप लावली जाणार आहे. या चिपमध्ये संबंधित व्यक्तीचा सर्व तपशील असणार आहे. या बुकलेटची छपाई नाशिकमधील भारतीय प्रतिभूती मुद्रणालयात केली जाणार आहे.

पहिल्या टप्प्यात 10 लाख ई-पासपोर्ट जारी करण्याचे लक्ष्य ठेवण्यात आले आहे.70 देशांमध्ये भारतीयांसाठी इमिग्रेशन प्रक्रिया सोपी होणार आहे. 4.5 कोटी बुकलेट्सची ऑर्डर आगामी 4 ते 5 वर्षांसाठी देण्यात आली आहे. पहिल्या वर्षी 70 लाख बुकलेट छापले जाणार आहेत. ई पासपोर्टसाठी आवश्यक मॅनेजमेंट सीस्टिम, इंटरऑपरेबिलिटी टेस्ट बेड, प्रोजेक्ट मॅनेजमेंट युनिट, ई-पर्सनलायजेशन, ई-पासपोर्ट व्हेरिफिकेशन, इमिग्रेशन चेकपोस्ट इ. स्वरूपातील तांत्रिक नेटवर्क जूनपर्यंत पूर्ण होईल.