पणजी – गेल्या काही वर्षांत गोव्यात हिंस्र जातीच्या पाळीव कुत्र्यांकडून नागरिकांचे चावे घेण्याचे प्रकार उघडकीस आले आहेत. यात काही बालकांचा बळीही गेला आहे. त्यामुळे अशा प्रकारांवर नियंत्रण आणण्यासाठी आता सर्वच प्रकारच्या पाळीव कुत्र्यांची नोंदणी करण्याचा निर्णय राज्य सरकारने घेतला आहे. फेब्रुवारीच्या पहिल्या आठवड्यापासून पाळीव कुत्र्यांच्या नोंदणीची प्रक्रिया नगरविकास खात्यामार्फत केली जाणार आहे.
पाळीव कुत्र्यांच्या नोंदणीचे हे काम सुरवातीला पशुपालन आणि पशुसंवर्धन खात्याने की पंचायत खात्याने करायचे, याबाबत विचारविनिमय सुरू होता. परंतु हे काम आता नगरविकास खात्याकडे देण्यात आले आहे. पाळीव कुत्र्यांच्या नोंदणीसाठी ऑनलाईन नोंदणीचे पोर्टल तयार आहे. परंतु ते अद्याप अधिकृतपणे सुरू करण्यात आलेले नाही. कुत्र्यांच्या नोंदणी प्रक्रियेसाठी मार्गदर्शक तत्त्वे तयार करण्यात आली आहेत. याबाबतची अधिकृत अधिसूचना जारी झाल्यानंतर कुत्र्यांची नोंदणी सुरू होणार असल्याचेही सूत्रांनी सांगितले.
गोव्यात फेब्रुवारीपासून पाळीव कुत्र्यांची नोंदणी
