कोल्हापूर – गोव्यावरून छत्रपती संभाजीनगरकडे जाणारी खासगी बस करवीर तालुक्यातील कांडगावात काल मध्यरात्री उलटली. त्यात एकाचा जागीच मृत्यू झाला,तर ३० जण जखमी झाले. त्यातील ४ जण गंभीर आहेत. अमोल परशुराम भिसे असे मृत व्यक्तीचे नाव असून तो छत्रपती संभाजीनगरचा रहिवासी होता.छत्रपती संभाजीनगरमधील एका कंपनीचे कर्मचारी सहलीसाठी बसने गोव्याला गेले होते.गोव्याहून परतताना ते कणकवलीत जेवणासाठी थांबले. जेवणानंतर त्यांची बस कोल्हापूरच्या दिशेने निघाली. यावेळी कांडगावच्या शिंदे मळ्याजवळ ही बस वळणावर येताच उलटली.या घटनेची माहिती मिळताच स्थानिक ग्रामस्थांसह पोलिसांनी घटनास्थळी धाव घेऊन मदतकार्य सुरू केले आणि त्यांनी जखमी कर्मचाऱ्यांना बसमधून बाहेर काढले. त्यांना कोल्हापूरच्या सीपीआर आणि खासगी रुग्णालयांमध्ये दाखल केले. या अपघातात भिसे यांचा मृत्यू झाला, तर ३० जण जखमी झाले.त्यापैकी ४ जणांची प्रकृती चिंताजनक आहे.