तिरुअनंतपुरम : केरळमध्ये बुधवारी, आणखी एक निपाहबाधित रुग्ण आढळल्यानंतर निपाह रुग्णांची संख्या आता पाचवर गेली आहे. त्यामुळे केरळमधील आरोग्यव्यवस्था सतर्क झाली असून, केरळमध्ये मिनी लॉकडाऊन जाहीर करण्यात आला आहे. केरळ राज्याच्या आरोग्य मंत्री वीणा जॉर्ज यांनी राज्यात पाच निपाह रुग्ण आढळल्याची माहिती दिली. वीणा जॉर्ज म्हणाल्या की, राज्य सरकारने संसर्गाचा प्रसार रोखण्यासाठी प्रतिबंधित क्षेत्र (कंटेनमेंट झोन) तयार केले आहेत.
कोझिकोड जिल्ह्यातील ९ पंचायतींचे ५८ वॉर्ड प्रतिबंधित क्षेत्र (कंटेनमेंट झोन) म्हणून जाहीर करण्यात आले आहे, येथे फक्त आपत्कालीन सेवांना परवानगी देण्यात आली आहे. आपत्कालीन जीवनावश्यक वस्तूंची विक्री करणारी दुकाने सकाळी ७ ते सायंकाळी ५ वाजेपर्यंत उघडण्यास परवानगी आहे. केवळ फार्मसी आणि रुग्णालयांना वेळेची मर्यादा नाही. प्रतिबंधित क्षेत्रा (कंटेनमेंट झोन) मधून प्रवास करणाऱ्या राष्ट्रीय महामार्गावरील बस केरळमध्ये थांबवू नये, असे आदेश देण्यात आले आहेत. तसेच याआधी निपाहमुळे मृत्यू झालेले दोन रुग्ण ज्या रस्त्यावरुन गेले होते, त्या मार्गाचा वापर न करण्याचे आदेशही देण्यात आले आहेत. कोझिकोड जिल्ह्यात सार्वजनिक उत्सव, इतर कार्यक्रमांवर बंदी घालण्यात आली आहे. निपाह व्हायरसचे संक्रमण रोखण्यासाठी केरळ प्रशासनाने उपाययोजना सुरू केल्या असून, रुग्णांच्या संपर्कात आलेल्या सुमारे ७०० जणांची यादी तयार करण्यात आली आहे. यापैकी ७७ जणांना उच्च जोखमीच्या श्रेणीत (हाय रिस्क कॅटेगरी) ठेवण्यात आले असून, या ७७ जणांना घराबाहेर न निघण्याचे आदेश देण्यात आले आहेत. कोझिकोड जिल्ह्यातील ९ वर्षांच्या मुलालादेखील निपाहची लागण झाली आहे. हा मुलगा व्हेंटिलेटरवर असून त्याच्या उपचारासाठी सरकारने आयसीएमआर कडून मोनोक्लोनल अँटीबॉडीज मागवले आहेत.
