अहमदनगर – शनिशिंगणापूर येथील श्री शनैश्चर देवाची जयंती पाश्चात्त्य पद्धतीने केक कापून साजरी करण्यास बंदी घालण्यात आली आहे. याबाबत महाराष्ट्र मंदिर महासंघाच्या शिष्टमंडळाने श्री शनैश्चर देवस्थानचे मुख्य कार्यकारी अधिकारी नितीन शेटे यांची भेट घेऊन हा प्रकार थांबवण्याचे आवाहन केले. त्याला सकारात्मक प्रतिसाद देत श्री शनैश्चर देवस्थानने ही प्रथा बंद केली.
शनिशिंगणापूर येथील श्री शनैश्चर या जागृत देवस्थानच्या ठिकाणी मागील ३ ते ४ वर्षांपासून काही भाविक श्री शनिदेवतेची जयंती केक कापून साजरा करत होते. १९ मे या दिवशी श्री शनैश्चर जयंतीला या अशास्त्रीय प्रकाराची पुनरावृत्ती होऊ नये, म्हणून महाराष्ट्र मंदिर महासंघाच्या शिष्टमंडळाने मंदिर प्रशासनाला हा प्रकार रोखण्याची विनंती केली. महासंघाच्या आवाहनानंतर देवस्थानने तत्परतेने कृती केल्याबद्दल महाराष्ट्र मंदिर महासंघाचे समन्वयक सुनील घनवट यांनी श्री शनैश्चर देवस्थानचे आभार मानले. तसेच भविष्यात देवस्थानच्या पावित्र्याला कोणतीही बाधा निर्माण होऊ नये, या दृष्टीने यापुढे काळजी घ्यावी, असेही आवाहन केले.
‘देवतेच्या जन्मदिनी केक कापणे, हे धर्मशास्त्राला धरून नाही. श्री शनैश्चर देवस्थानच्या घटनेतही अशा प्रथेचा उल्लेख नाही. देवस्थानच्या आवारात जयंतीनिमित्त केक कापणारे भविष्यात पाश्चात्यांप्रमाणे नाचगाण्यांचे कार्यक्रमही आयोजित करतील. देवस्थान हे मौजमजा करण्यासाठी नव्हे, तर देवतेची धर्मशास्त्रानुसार उपासना करून आध्यात्मिक लाभ मिळवण्यासाठी असते. त्यामुळे त्यांचे पावित्र्य अबाधित ठेवणे, हे प्रत्येक हिंदू भाविकाचे धर्मकर्तव्य आहे.’ असे ‘महाराष्ट्र मंदिर महासंघा’च्या वतीने सांगण्यात आले.
