राजौरी : नाशिकच्या चांदवड तालुक्याचा भूमिपुत्र व भारतीय सैन्य दलाचा जवान विकी अरुण चव्हाण (२४) याचा शुक्रवार ग्रीको रोमन रेसलरचा (कुस्ती) सराव करीत असताना गंभीर जखमी होऊन त्यांचा मृत्यू झाला. या घटनेमुळे संपूर्ण चांदवड तालुक्यात शोककळा पसरली आहे.
भूमिपुत्र विकी अरुण चव्हाण हा सन २०१८ मध्ये भारतीय सैन्य दलाच्या १४ महार बटालियन दलात शिपाई पदावर भोपाळच्या सागर येथे भरती झाला होता. भरतीनंतर प्रशिक्षण घेऊन विकी जम्मू कश्मीर राज्यातील पूँछ (राजौरी) येथे कार्यरत होता. विकी हा लहानपणापासून कुस्ती खेळत होता. त्यामुळे सैन्यात भरती झाल्यावर विकी ग्रीको रोमन रेसलर या कुस्तीच्या स्पर्धा खेळू लागला. पुढील महिन्यात पुणे येथे राष्ट्रीय ग्रीको रोमन रेसलर स्पर्धा आयोजीत करण्यात आल्या आहेत. यासाठी विकी दररोज खूप मेहनत घेत सराव करत होता. शुक्रवारी स्पर्धेचा सराव करीत असताना तो गंभीर जखमी झाला. रुग्णालयात उपचारादरम्यान त्यांचा मृत्यू झाला.
