काबुल- उत्तर अफगाणिस्तानमध्ये सुमारे ८० शाळकरी विद्यार्थिनींना विषबाधा झाली. संशयाची सुई तालिबानकडे वळत आहे. पण तालिबानने दावा फेटाळत या घटनेत कोणताही सहभाग नसल्याचे म्हटले आहे.
उत्तर अफगाणिस्तानमधील प्राथमिक शाळांवर झालेल्या दोन वेगवेगळ्या घटनेत सुमारे ८० मुलींना विषबाधा झाली. त्यांना रुग्णालयात दाखल करण्यात आले, असे एका स्थानिक शिक्षण अधिकाऱ्याने रविवारी सांगितले. प्रांतीय शिक्षण विभागाचे संचालक मोहम्मद रहमानी यांनी सांगितले की, संघचारक जिल्ह्यात इयत्ता १ ते ६ मधील विद्यार्थिनींना विषबाधा झाली आहे. तसेच, नसवान-ए-कबोद आब शाळेतील ६० आणि नसवान-ए-फैजाबाद शाळेतील आणखी १७ मुलांना विषबाधा झाली होती. दोन्ही प्राथमिक शाळा एकमेकांच्या जवळ आहेत आणि त्यांना एकामागून एक लक्ष्य करण्यात आले, असल्याचा दावा करण्यात आला आहे. दरम्यान ऑगस्ट २०२१ मध्ये तालिबान सत्तेवर आल्यानंतर अशा प्रकारची ही पहिलीच घटना आहे.