मुंबई :
कुलाबा-वांद्रे-सीप्झ मेट्रो ३ मार्गिकेच्या कामासाठी आरे कॉलनीतील १७७ झाडे कापण्यास सर्वोच्च न्यायालयाने परवानगी दिल्याबरोबर मुंबई मेट्रो रेल कॉर्पोरेशनने (एमएमआरसी) आज झाडे कापण्याची कार्यवाही केली. आज पहाटे पाच वाजता कडक पोलीस बंदोबस्तात आरेतील झाडे कापण्यात आली. याचिकाकर्त्यांनी मात्र १७७ पेक्षा अधिक झाडे एमएमआरसीने कापल्याचा आरोप करून याबाबत तीव्र नाराजी व्यक्त केली.
मेट्रो ३ मार्गिकेच्या कामासाठी आरेतील झाडे कापण्याचा विषय सुरुवातीपासूनच संवेदनशील ठरला आहे. आरेतील झाडे कापण्यास पर्यावरणप्रेमी आणि आरेवासीयांचा विरोध आहे. मात्र एमएमआरसी न्यायालयाकडून परवानगी घेत झाडे कापण्याचे उद्दिष्ट पूर्ण करताना दिसत आहे. न्यायालयाच्या परवानगीनंतर रात्रीच्या वेळेस २०१९ मध्ये एमएमआरसीने झाडे कापण्याची कार्यवाही केली होती.ॉ
झाडे कापण्याची कार्यवाही करताना वृक्ष प्राधिकरणाचे वरिष्ठ अधिकारी (ट्रि ऑफिसर) राहणे बंधनकारक आहे. पण आजच्या कार्यवाहीदरम्यान वृक्ष प्राधिकरणाचे अधिकारी उपस्थित नसल्याचा आरोप याचिकाकर्त्या अमरिता भट्टाचार्य यांनी केला आहे. तर १७७ पेक्षा अधिक झाडे कापण्यात आल्याचा ही आरोप त्यांनी केला. दरम्यान याबाबत एमएमआरसीकडे विचारणा केली असता त्यांच्याकडून अद्याप कोणतीही प्रतिक्रिया उपलब्ध झालेली नाही.
