मुंबई – अभिनेते, निर्माते आणि दिग्दर्शक महेश कोठारे यांच्या आई ज्येष्ठ रंगकर्मी सरोज ऊर्फ जेनमा कोठारे यांचे वृद्धापकाळाने निधन झाले. त्या ९३ वर्षांच्या होत्या. कांदिवली येथील स्मशानभूमीत त्यांच्यावर अंत्यसंस्कार करण्यात आले. सरोज कोठारे यांच्या पश्चात मुलगा महेश कोठारे, नातू अभिनेता आदिनाथ कोठारे असा परिवार आहे.
जानेवारी महिन्यातच महेश कोठारे यांचे वडील ज्येष्ठ रंगकर्मी अंबर कोठारे यांचे निधन झाले होते.जेनमा कोठारे यांचे मूळ नाव सरोज असून त्यांचे वडील माधवराव तळपदे हे बहुश्रुत व्यक्तिमत्त्व असल्याने जेनमा यांच्यावर लहानपणापासून चांगले संस्कार झाले. त्यावेळी प्रायोगिक रंगभूमीच्या माध्यमातुन जेनमा आणि महेश कोठारे यांचे वडील अंबर कोठारे यांची पहिल्यांदा एकमेकांना भेटले.१९५२ मध्ये ते लग्नबंधनात अडकले.सरोज यांना ‘जेनमा’ हे टोपण नाव त्यांच्या मावस बहिणीने दिले होते. जेनमा आणि अंबर कोठारे यांनी कालांतराने ‘आर्टिस्ट कंबाइन’ नावाची नाट्यनिर्मिती संस्था स्थापन केली. या संस्थेतर्फे ते विविध नाटके सादर करीत असत. ‘लग्नाची बेडी’, ‘झोपी गेलेला जागा झाला’ या नाटकात जेनमा आणि अंबर कोठारे यांनी एकत्र काम केले होते.