त्र्यंबकेश्वर मंदिरातील पिंडीवर बर्फ जमा
झाल्याचा बनाव! तीन पुजाऱ्यांना अटक

नाशिक – नाशिकच्या त्र्यंबकेश्वर मंदिरातील पिंडीवर बर्फ जमा झाल्याची माहिती गेल्यावर्षी जून महिन्यात समोर आली होती. मात्र, हा बनाव असल्याचे उघड झाले आहे. याप्रकरणी देवस्थान समितीच्या वतीने तक्रार दाखल करण्यात आली. ३० जून २०२२ रोजी पहाटे त्र्यंबकेश्वराच्या पिंडीवर बर्फ आढळल्याचे समोर आले होते. याप्रकरणी तिघांवर गुन्हा दाखल झाला असून याबाबत पोलीस अधिक तपास करत आहेत.
त्र्यंबकेश्वर मंदिरातील गर्भगृहातील शिव पिंडीत बर्फ तयार झाल्याचा व्हिडिओ ३० जून २०२२ रोजी व्हायरल करण्यात आला होता. त्र्यंबकेश्वरचे हवामान आणि गर्भगृहातील तापमान पहाता बर्फ कसा तयार झाला, यावर अनेकांनी शंका उपस्थित केली होती. त्यावर सत्यशोधन समिती गठित करून सीसीटीव्ही फुटेजची तपासणी करण्यात आली. ज्यात तुंगार ट्रस्टच्या तिघांनीच पिंडीवर हा बर्फ ठेवल्याचे उघड झाले. अमरनाथ प्रमाणेच त्र्यंबकेश्वरलाही बर्फ तयार झाला असा खोटा प्रचार केल्याचा आरोप सुशांत तुंगार, आकाश तुंगार आणि उल्हास तुंगार यांच्यावर करण्यात आला असून या तीन पुजाऱ्यांना अटक करण्यात आली आहे.